ފަނޑިޔާރުކަމުގެ މަސްއޫލިއްޔަތު އަދާކުރުމަށް ކޮންމެ ފަނޑިޔާރަކު ވެސް އޭނާގެ ހުރިހައި ވަގުތެއް ތަޚްޞީޞްކުރަން ވާނެކަމަށް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީ އާއި ފަނޑިޔާރުންގެ ޤާނޫނު އަދި ފަނޑިޔާރުންގެ ސުލޫކީ މިންގަނޑުގައި  ބަޔާންކޮށްފައި ވީހިނދު،  ހަފްތާ ބަންދު ދުވަސްތަކުގައި ނުވަތަ ރަސްމީ ބަންދު ދުވަސްތަކުގައި ވިޔަސް ފަނޑިޔާރުން ޢައްޔަނު ކުރެވިފައިވާ ކޯޓު ނުވަތަ ދާއިރާއިން ބޭރަށް ނުވަތަ ރާއްޖޭއިން ބޭރަށް ވަޑައިގަންނަވާނަމަ އެކަން ތިރީގައި ބަޔާން ކޮށްފައިވާ ގޮތުގެ މަތީން އެނގުމަށް ދަންނަވަމެވެ. 

- އުއްތަމަފަނޑިޔާރާއި، ހައިކޯޓުގެ އިސްފަނޑިޔާރާއި، ސުޕީރިއާރ ކޯޓުތަކުގެ އިސްޤާޟީންނާއި، ޖުޑީޝަލް ދާއިރާތަކުގެ އިސްމެޖިސްޓްރޭޓުން ރަށުން ބޭރަށް ވަޑައިގަންނަވާނަމަ އެކަން ޖުޑީޝަލް ސަރވިސް ކޮމިޝަނަށް އެންގެވުން.

- އުއްތަމަ ފަނޑިޔާރު ފިޔަވައި ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުން ރަށުން ބޭރަށް ވަޑައިގަންނަވާނަމަ އެކަން އުއްތަމަ ފަނޑިޔާރަށް އެންގެވުން. 

- ހައިކޯޓުގެ އިސްފަނޑިޔާރު ފިޔަވައި އެކޯޓުގެ ފަނޑިޔާރުން ރަށުން ބޭރަށް ވަޑައިގަންނަވާނަމަ އެކަން ހައިކޯޓުގެ އިސްފަނޑިޔާރަށް އެންގެވުން.

- ސުޕީރިއަރ ކޯޓުތަކުގެ ޤާޟީން ރަށުން ބޭރަށް ވަޑައިގަންނަވާނަމަ އެކަން އެކޯޓެއްގެ އިސްޤާޟީއަށް އެންގެވުން.

- ޖުޑީޝަލް ދާއިރާތަކުގެ މެޖިސްޓްރޭޓުން ޤާއިމުވެ ތިއްބަވާ ރަށުން، ބޭރަށް ވަޑައިގަންނަވާނަމަ އެކަން އެޖުޑީޝަލް ދާއިރާއެއްގެ އިސްމެޖިސްޓްރޭޓަށް އެންގެވުން.