އއ.އުކުޅަހު މެޖިސްޓްރޭޓް ކޯޓުގެ އިސްމެޖިސްޓްރޭޓް އަލްއުސްތާޛު އަޙްމަދު މުއާވިޔަތު ޤާސިމްގެ މައްޗަށް ސިވިލް ކޯޓަށް ހުށަހެޅި ނިމިފައިވާ ސާބިތުދަރަނީގެ މައްސަލައާ ގުޅިގެން ޙުކުމާ އެއްގޮތަށް ދަރަނި އަދާކޮށްފައި ނުވާކަން މައްސަލައިގެ ލިއެކިޔުންތަކުން އެނގެން އޮތުމާއި، އަދި މި ޙުކުމާ އެއްގޮތަށް ދަރަނި އަދާކޮށްފައި ނުވާނެ ކަމަށް އިސްމެޖިސްޓްރޭޓް އަލްއުސްތާޛު އަޙްމަދު މުއާވިޔަތު ޤާސިމް ތަޙްޤީޤުގައި އިއުތިރާފް ވެފައިވާތީ، ޤާނޫނު ނަންބަރު 2010/13 (ދިވެހިރާއްޖޭގެ ފަނޑިޔާރުންގެ ޤާނޫނު) ގެ 15 ވަނަ މާއްދާގެ (ބ) ގެ (2) ވަނަ ނަންބަރުގައިވާ ގޮތުން، ސާބިތު ދަރަންޏަށް ފައިސާ ނުދެއްކުމަކީ ޤާނޫނުއަސާސީގެ 149 ވަނަ މާއްދާގެ (ހ) ގައި ބަޔާންކޮށްފައިވާ ފަނޑިޔާރުންގެ ކިބައިގައި ހުރުން ލާޒިމްކުރާ ޝަރުތުތަކުގެ ތެރެއިން ޝަރުތެއް އުނިވާނެ ކަމެއް ކަމުގައިވެފައި، އެއިން ޝަރުތެއް ފަނޑިޔާރެއްގެ ކިބައިން އުނިވެއްޖެނަމަ އެ ފަނޑިޔާރަކު ހުރި މަޤާމު ހުސްވީ ކަމުގައި އެ ޤާނޫނުގެ 29 ވަނަ މާއްދާގެ (ކ) ގައި ބަޔާންކޮށްފައިވާ ހިނދު، އިސްމެޖިސްޓްރޭޓް އަޙްމަދު މުއާވިޔަތު ޤާސިމްގެ ކިބައިން ފަނޑިޔާރުކަމުގެ އެ އަސާސީ ޝަރުތު އުނިވެފައިވާތީ، އަލްއުސްތާޛު އަޙްމަދު މުއާވިޔަތު ޤާސިމް އަދާކުރަމުންދިޔަ އއ.އުކުޅަހު މެޖިސްޓްރޭޓް ކޯޓުގެ އިސްމެޖިސްޓްރޭޓްގެ މަޤާމު ހުސްވީކަމުގައި 2024 ޑިސެންބަރު 25 ވަނަ ދުވަހު ބޭއްވުނު މި ކޮމިޝަނުގެ މިއަހަރުގެ 66 ވަނަ ބައްދަލުވުމުގައި ވަނީ ނިންމާފައެވެ.